نص مداخلة النائب أحمد إبراهيم في جلسة مساءلة ومحاولة "سحب الثقة" من كربول وصفر (بالدارجة المهذبة)
10 mai 2014, 14:30
فيما يلي النص الكامل للمداخلة في المجلس الوطني التأسيسي وهي لم تتجاوز 5 دقائق ونيف. مما اضطرني إلى حذف بعض التفاصيل المهمة التي أوردها هنا في هذه المكتوبة باللهجة التونسية "المهذبة"...
سيدي الرئيس، السيدة الوزيرة، السيد الوزير، سيداتي سادتي،
في رأيي أن موضوع مقاومة التطبيع ما يلزموش يقعد وإلا يتحول إلى شعار فضفاض.
يلزمنا ننتبهو لكون بعض المقاربات المطروحة هوني وخارج المجلس، مطروحة من الزاوية الغلط، زاوية المزايدات أو تسجيل نقاط على بعضنا البعض وإلا على الحكومة.
أنا مع النظر إلى مقاومة التطبيع من زاوية القيام بمواقف عملية لصالح الشعب الفلسطيني ولتشديد المحاصرة والخناق على إسرائيل.
من هذه الزاوية متاع العقلانية والنجاعة باش نتعرض ل 5 نقاط.
1 ) النقطة الأولى: كيفاش نعزلو إسرائيل؟
في رأيي علينا الاستلهام من مثال جنوب إفريقيا
ثمة تجربة عمرها تقريبا 10 سنوات نبعت من جمعيات المجتمع المدني الفلسطيني اسمها بالانكليزيةBDS ( Boycott, Devestment, Sanction) أي " مقاطعة- سحب الاستثمارات- تسليط العقوبات .
هذه التجربة اللي انتشرت في أوروبا وأمريكا لدي جمعيات مجتمع مدني مقتنعة بعدالة القضية الفلسطينية كان لها نتائج موجعة للصهيونية وكبدتها خسائر تقدر بمئات الملايين من الدولارات، وآخر مثال في البرتغال حيث أجبرت التحركات متاع الحملة شركة توزيع المياه البرتغالية على فسخ عقد كان لها مع شركة المياه الاسرائيلية Merocot... وثمة مثال آخر يتعلق بالشركة العملاقة ميكروسفت متاع Bill Gates اللي استهدفتها الحملة لأنها تتعامل مع السلطات الاسرائيلية وتعطيها اللوجسيالات متاعها باش تستعملها في معاملة الأسرى الفلسطينيين وفي ال Sheck Points متاعها في الضفة الغربية وقريبا إن شاء الله يجي سي بيل غايت للثنية الصحيحة!
2) النقطة الثانية: كيفاش نجبرو إسرائيل على إطلاق سراح الأسرى الفلسطينيين، وانا نحيي بالمناسبة الأسيرين، رفيقي الزعيم أحمد سعدات وأخي الزعيم مروان البرغوثي، والبارح انطلقت حملة عالمية من إرلاندا بمشاركة نواب ارلنديين واوروبيين وبرشة شخصيات وحاضرة فيها مالجملة الأخت فدوى البرغوثي زوجة مروان، وحاضر فيها الرفيق الزعيم أحمد كتراتة رفيق درب منديلا ورئيس حملة مناهضة الأبارتايد الاسرائيلي في جنوب افريقيا…
3 ) النقطة الثالثة: كيفاش ناقفو مع فلسطينيي 48؟
كيفاش ناقفولهم وهوما مليون ونصف اختارو البقاء على أرضهم "على صدوركم باقون" كيف ما قال الشاعر!
هاذوما اللي تسميهم الصححافة الغربية les Arabes israéliens !
هاذوما أنجبوا توفيق زياد وإميل حبيبي وسميح القاسم، اللي يعرفوه التوانسة لأنه زار تونس مرات وزارها باش؟ بباسبور معروف ... ("إسرائيلي")!
هوما اللي بادرو في 1976 بتنظيم "يوم الأرض" وما أدراك اللي ولى من وقتها يوم الكفاح متاع كل الشعب الفلسطيني ومتاع التضامن كل الشعوب المحبة للحرية والسلام العادل "عربا وعجما"!
هوما اللي في هذه الأيام قاعدين يقوموا بحملة عظيمة ومتعاضمة بمناسبة ذكرى "النكبة"، ضد الخدمة العسكرية والتجنيد اللي تحب تفرضوا العسكرتاريا الاسرائيلية على الأهالي العرب مع التركيز على المسيحيين كيف ما ركزوا في السابق على الدروز... ومنذ بضعة أيام قاعد يتم تحرك للطلبة الفلسطينيين متاع 48 في "الجامعة العرية" بالقدس الغربية عبارة عن وقفة احتجاجية على التجنيد شارك فيها سلك التدريس ومحاضرين عرب ويهود متضامنين مع طلبتهم والوقفة شارك فيها المناضل محمد بركة رئيس الجبهة الديمقراطية للسلام والمساواة والنائب في الكنيست...
فهل هذا "تطبيع"؟
لا! بالعكس! حطوا خشم نتنياهو في الطبعة!!
4) النقطة الرابعة: كيفاش ناقفو مع الفلسطينيين من أصل تونسي؟
نعم! ثمة فلسطينيين من أصل تونسي! ثمة قرابة 300 في قطاع غزة وقرابة 300 في الضفة وثمة زادة عشرات العائلات في "باب المغاربة" في القدس ... تعرفوا "وقفية بومدين" ... القادم من تلمسان وهذا يلزم يدفعنا إلى التنسيق مع الجزائرين والمغاربة ... كلنا "شركة" في ها الورثة متاع أجداد أجدادنا...
ويلزم حكومتنا تأخذ تدابير عملية وملموسة لفائدة أولاد تونس، ناقفو معاهم ونتكفل بهم ونشدو ازرهم في المقاومة متاعهم ضد انتزاع ممتلكاتهم من طرف الصهاينة!
5) النقطة الخامسة والأخيرة: هي عبارة على "تفكير بصوت عالي"...
ومعروف أن الحج إلى القدس كان من تقاليد أجدادنا منذ قرون وهو تقليد تواصل حتى "النكبة"...
ما دمنا نسمح لليهود اللي جايين من اسرائيل للحج وأداء فرائضهم الدينية (حتى برخصة عبور)، لماذا لا نتعامل بمبدأ "المعاملة بالمثل"؟؟ لماذا لا نطالب بحق الحجاج التوانسة المقدس؟
كيفاش نكرسو هالفكرة على أرض الواقع؟
ما هو معروف عن حكام اسرائيل اللي وقت اللي يقع واحد من ضباطهم أو جنودهم في أسر الفلسطينيين جرات العادة أنهم ساعات يعملو بمقولة "رجل كألف" يعني يسترجعو الواحد منهم مقابل الإفراج عن عدد كبير من الأسرى الفلسطينيين، عدد ساعات يوصل للألف!
ما دام سمعت اللي عدد الحجاج اللي جايين من غادي هو 50 حاج مثلا فهذا يعني انه بإمكاننا إرسال 50 ألف حاج تونسي لبيت المقدس يمشيوا يصليوا في الحرم الشريف وهكذا نضربو عصفورين بححرة:
- نفكو العزلة اللي فارضتها اسرائيل على القدس ونتجاوبو مع الدعوة اللي وجهها الأخ أبو مازن للعرب والمسلمين باش يزوروا القدس وما يخليوهاش أسيرة العصابة
- نعاونو الاقتصاد الفلسطيني والسياحة الفلسطينية والسياحة متاعنا زادة بالمناسبة على خاطرحجاجنا يمشيوا يصليوا غاديكا ويعملو دورة في الخليل ومقام النبي ابراهيم ويسكنوا ويباتوا في رام الله والا أريحا والا نابلس...
في عوض نضيعوا وقتنا في الخطب الحماسية ونتعاركو خلينا نعملو حاجة مفيدة ونربكوهم ونوجهولهم ضربة اللي توجعهم بالحق!
ختاما: نحب نوجه دعوة للتفكير مليا في هذه الأمور ...
نفكرو في المعارك الحقيقية في ظل الحرص طبعا على استقلالية قرارنا والتمسك بثوابتنا الوطنية والقومية (والإنسانية أيضا) وفي ظل الثبات في وجه الضغوطات المباشرة وغير المباشرة الجاية من حماة اسرائيل وأصدقاء الصهاينة...
إخواني أوزنوا مليح كل التداعيات اللي يمكن تنجر عن الحملات والتصرفات غير المحسوبة والثورجية الحمقاء... تداعيات على ال croisieristes التوانسة وال voyagistes التوانسة والسياحة متاعنا...
خلينا نكونوا ناجعين وفاعلين في مناهضة التطبيع هلكن في مقاومة عملية وحقيقية لا كلامية بعيدا عن السجال العقيم..
احنا في حزب المسار الديمقراطي الاجتماعي مع المقاومة الذكية للتطبيع
حزب المسار الديمقراطي الاجتماعي ماهوش مع المقاومة الرعوانية للتطبيع
حزب المسار الديمقراطي الاجتماعي لم يكن مع الجماعة المطالبين بمثل هذه "المحاسبة" خاصة في جو المزايدات الفارغة
حزب المسار الديمقراطي الاجتماعي ضد الدعوة ل"سحب الثقة" من الوزيرين!
صحيج اللي ثمة حاجة سميتها توه جمعتين في إحدى الفضائيات، حاجة سميتها "تغفيسة"... إيه، وقع خطأ في التقدير والإخراج من طرف سي رضا، ولكن خطأ يقع ... وسبحان من لا يخطئ! لكن هذا ما يررش هالزوبعة في فنجان وها "العيطة وشهود على ذبيحة قنفود"... صفحة وطويناها…
السيدة آمال، السيد رضا، ربي يعينكم ، وربي يحمي بلادنا، والسلام عليكم ورحمة الله.
